វ៉ាស៊ីនតោន៖ រដ្ឋមន្ត្រីពាណិជ្ជកម្មអាមេរិក លោកស្រី Gina Raimondo បានលើកឡើងថាអាមេរិកកំពុងស្វែងរកការធ្វើការបន្ថែមទៀតជាមួយអាស៊ានដើម្បីកសាងភាពធន់ និងសុវត្ថិភាពការច្រើននៅក្នុងសង្វាក់ផ្គត់ផ្គង់របស់ខ្លួន។

ថ្លែងក្នុងកិច្ចប្រជុំកំពូលអាស៊ាន-អាមេរិក វគ្គទី២ នៅថ្ងៃទី១២ ខែឧសភា ឆ្នាំ២០២២ លោកស្រី Gina Raimondo បានលើកឡើងថា អ្វីដែលអាមេរិកសម្លឹងមើលបន្ទាប់ពីវិបត្តិជំងឺកូវីដ-១៩ គឺតំបន់ដែលគ្មានការរំខាននៃខ្សែសង្វាក់ផ្គត់ផ្គង់។ លោកស្រីបន្តថា អាមេរិកកំពុងស្វែងរកធ្វើការជាមួយអាស៊ាន និងក្រុមហ៊ុននានារបស់អាស៊ាន ដើម្បីកសាងភាពធន់ និងសុវត្ថិភាពកាន់តែច្រើននៅក្នុងខ្សែសង្វាក់ផ្គត់ផ្គង់របស់យើង។

សមាជិកអាស៊ាន និងជាប្រធាន G20 ឆ្នាំ២០២២ ប្រធានាធិបតីឥណ្ឌូនេស៊ី លោក ចូកូ វីដូដូ បានថ្លែងថា ឥណ្ឌូនេស៊ីចង់ធានាថា G20 នឹងដើរតួជាកាតាលីករសម្រាប់ការងើបឡើងវិញនៃសេដ្ឋកិច្ចពិភពលោកជាពិសេសប្រទេសកំពុងអភិវឌ្ឍន៍។

លោកថា៖ «ទាំងអស់នេះទាមទារភាពជាដៃគូដ៏រឹងមាំរវាងរដ្ឋាភិបាល និងសហគមន៍ធុរកិច្ច ហើយខ្ញុំសង្ឃឹមថា CEO នៃក្រុមហ៊ុនធំៗរបស់សហរដ្ឋអាមេរិកអាចអភិវឌ្ឍកិច្ចសហប្រតិបត្តិការជាក់ស្តែងនៅក្នុង G20 និងជាមួយអាស៊ាន ជាពិសេសជាមួយឥណ្ឌូនេស៊ី»។

កិច្ចប្រជុំកំពូលអាស៊ានអាមេរិកដែលនឹងប្រព្រឹត្តទៅនៅថ្ងៃទី១២ និង១៣ ខែឧសភា។ កិច្ចប្រជុំកំពូលនេះ ជាកិច្ចប្រជុំកំពូលពិសេសលើកទី២ គិតពីឆ្នាំ២០១៦ ហើយជាការជួបប្រជុំគ្នាដោយផ្ទាល់មុខលើកទី១ សម្រាប់ថ្នាក់ដឹកនាំនៃសហរដ្ឋអាមេរិក និងអាស៊ានគិតចាប់តាំងពីឆ្នាំ២០១៧មក៕